CEBU, Philippines - Gibalhin na og laing prisohan ang jailguard sa Talisay City Jail nga gipasanginlang nanglugos sa babayeng adunay kapuyong bilanggo sumala pa sa Jail Warden nga si Renante Rubio.
Si Rubio mibutyag sa Banat News mireklamo kaniya ang giingong biktima niadtong unang semana sa Nobiyembre hinungdan nga mipahigayon dayon siya og imbestigasyon ug pagka-Nobiyembre 26, 2011 giparelibohan niya ang maong jail officer kansang pangalan wala niya ibutyag.
Ang maong jailguard napasakaan og kaso nianang bulana tungod sa alegasyong gilugos niini ang kapuyo sa pinirisong adunay kasong pagpangawat ug ilegal nga drugas sulod sa usa ka sam-ang sa dakbayan sa Sugbu sumala pa sa report sa TV Patrol Central Visayas.
Gihulagway ni Rubio nga ang nahisgutang jailguard dili badlungon sa trabaho gawas lang nga estrikto kini ngadto sa mga moduaw sa mga piniriso.
Ang jail officer ug ang 25-anyos nga biktima nagkaila diha sa Talisay City Jail dihang magsige og duaw sa kapuyo ang biktima. (BANAT NEWS)