CEBU, Philippines - Patay diha-diha ang usa ka 36-anyos nga lalaki human kini uloha sa pagpusil sa iyang silingan tungod sa personal nga bangi niadtong Biyernes sa gabii diha sa barangay Bulacao, dakbayan sa Talisay.
Ang biktima mao si Ian Paul Jamili , residente sa maong dapit kinsa nakaangkon og usa ka samad pinusilan sa iyang ulo wala nay kinabuhi nga nadangat ngadto sa Chong Hua Hospital.
Ang suspetsado mao si Dave Bentain Tancinco, 22, residente usab sa lugar kinsa daling misibat human sa hitabo ug padayon pang gipangita sa kapolisan sa oras sa pagsuwat niining balita.
Sila si PO2 Jude Enemecio, PO2 Roy Lofranco, PO1 Euwen Pitogo uban sa alert team ang daling miresponde sa maong insidente.
Matud ni Lofranco nga sa wala pa mahitabo ang pagpamusil ang suspetsado ug biktima nagkomprontasihay nga misangpot ngadto sa pagpamusil, wala pa matino sa kapolisan ang hinungdan sa giawayan sa duha apan giingong kaniadto duna nay lama ang panagsilingan sa duha.
Na-recover sa mga polis diha sa lugar nga nahitaboan ang duha ka kabhang sa mga bala sa kalibre .45 nga pistola, usa ka P5 nga sensilyo, usa ka deformed slug ug parte sa slug.
Ang mga polis nakadawat og report kagahapon nga ang suspetsado giingong gustong motahan apan hangtud sa oras sa pagsuwat niining balita wala pa mopatim-aw si Tancinco diha sa Talisay City Police Station. (Brenda D. Batuto/EIM) (BANAT)