CEBU, Philippines - Nagkaabot kagahapon sila si Lapulapu City Mayor Paz Radaza ug Kapitan Isabelito Darnayla sa barangay Basak sa maong dakbayan sa paghatag og ayuda sa mga biktima sa baha sa maong barangay.
Mikabat sa 125 ka tawo ang apektado sa baha sa upat ka sitio sa Basak human sa duha ka adlaw nga walay bugto nga pag-ulan sa tibuok lalawigan sa Sugbo sa miaging Lunes ug Martes.
Hinuon gumikan sa giya sa mga kadagkoan sa barangay, ang mga biktima kansang mga balay gisanapan sa tubig uwan dali kaayong nakabakwit ngadto sa tulo ka mga evacuation center sa barangay.
Kagahapon personal nga gibisita ni Mayor Radaza ang maong mga evacuation center nga mao ang Basak Elementary School, Sudtungan Elementary School ug sa barangay Gym.
Ang upat ka mga sitio nga gilunopan sa tubig-uwan mao ang Sitio Iba, Purok 4, Sitio Royal ug Sitio Kaimitohan.
Sila si Mayor Radaza ug Kapitan Darnayla naghiusa sa pagpang-apod-apod sa mga banig, habol ug uban pa ilabi na sa pagkaon ngadto sa mga biktima. (BANAT NEWS)