CEBU, Philippines - Pito ka mga board passers sa Profesional Regulatory Commission (PRC-7) Licensure Examination for Teachers (LET) ang midangop sa buhatan sa Office of the Ombudsman-Visayas kini human gibasura ang ilang application aron unta malakip sa Oath Taking Ceremony.
Si Russel Martin Fullozos, D.M., PhD., usa sa mga board passer nga nagtungha sa Mandaue City College (MCC) mihangyo ni Deputy Ombudsman for the Visayas, Pelagio Apostol human ang PRC wala motugot kanila nga makatambong sa ipahigayong pagpanumpa karung umaabot Sabado.
Matud pa ni Folluzos nga ang Officer-In-Charge sa PRC nga si Director Atty. Dan Malayang gikatahong mikwestyon sa ilang pagkapasar kini tungod kay giingong “low quality” ang ilang tunghaan.
Midugang si Folluzos nga katulo na ka higayon nga sila misang-at og application apan ang tanan gibasura lang.
“For the 3rd time our application were denied by the PRC. They said Malayang was still in Manila and its arrival will be expected either December 16 or 19,” pasabot pa ni Folluzos.
Butyag usab ni Folluzos nga ilang katungod nga moapil sa pagpanumpa karung umaabot Sabado kini tungod kay nakapasar man sila sa eksaminasyon.
“We obtained our degrees for our future, using our own hard-earned income and even through our parents hand to mouth salary, ” tipik sa request nga gipadala.
Matud pa ni Folluzos nga isip representante sa unom niya nga kauban nga gikan sa Mandaue City College ilang gihangyo ang Ombudsman nga mopatunga ug modesisyon sa maong isyu.
Butyag usab ni Folluzos nga ang Philippine Association for Teachers Education (PAFTE) mipadala na og sulat ngadto sa legal department sa PRC kini aron sila tugutang makapanumpa.
Apan ang maong sulat gipasa ngadto na sa Solicitor General diin mao usab kini karon ang ilang gipaabot nga resulta. Si Folluzos ug laing unom ka mga tinun-an sa Mandaue City College nakapasar niadtong Septiyembre 25 ning tuiga sa gipahigayong board exam alang sa mga magtutudlo. (BANATNEWS)