CEBU, Philippines - Laing ex-convict ang gitumba sa gidudahang mga sakop sa vigilante kagahapon sa hapon alas-3:30 diha sa dalan Benedicto sa eskina sa P. Gaisano St., sitio Back Blessed Sacrament sa barangay Tejero siyudad sa Sugbu.
Si Kenneth Bailon, gibana-banang 20-25-anyos ang pangidaron nagpuyo sa sitio McArthur sa barangay Tejero, patay diha dayon human nakaangkon og daghang samad pinusilan sa iyang dughan ug ubang bahin sa iyang kalawasan.
Si Catherine Astillero, 43, nga maoy nagsagop sa biktima mitug-an sa mga tigbalita nga gikan pang naligo si Bailon pipila ka minutos sa wala pa kini pusila.
Matud niya nga nakugang nalang siya dihang gipahibawo siya sa ilang silingang si Andito Cantillas nga gipusil na ang iyang sinagop ug sa iyang pag-abot sa dapit iya nalang nakita nga nagbuy-od na ang biktima ug patay na.
Sigun sa nakasaksi sa hitabo, nakit-an ang biktima nga gigukod sa usa ka armadong lalaki ug pag-abot sa nahitaboan gipaulanan kini og bala diin ang uban didto miigo ang bala sa bungbong sa usa ka building.
Bisan tuod kun nakaangkon na og daghang samad pinusilan nakadagan pa og 20 ngadto sa 30 metros ang biktima una pa kini mahagba.
Ang kapulisan nga miresponde ug nag-imbestigar sa hitabo miingon nga wala pa silay lead si kinsa ang nipusil sa biktima.
Usa sa ilang susihon sa imbestigasyon kun wala ba kini atraso ang biktima nga gikan nakagawas sa bilanggoan niadtong bulan sa Agosto karung tuiga.