Emit wa matandog sa isyu

CEBU, Philippines - Ang kapitan sa barangay Pooc, dakbayan sa Talisay, Dorotheo “Dory” Emit wala matandog sa mga isyu batok kaniya ug giisip niya nga kabahin kini sa pamolitika.

Kini may labot sa pasangil nga matud pa gi-hire niyang kawani ang iyang asawa nga si Mila Emit.

Gawas niini gusto usab kuno ni Emit nga si Mila maoy ihulip sa nabakanteng pwesto nga gibiyaan ni   kanhi kapitan Osmundo Manreal Jr., kinsa nahimong first councilor sa Pooc ug milarga na ngadto sa Amerika.

Giangkon ni Emit   ang kamatuoran nga gihimo niyang “chief of staff” sa iyang buhatan sa barangay ang iyang asawa apan gihimakak niyang iya kining gi-endorso nga maoy mohulip   sa puwesto ni Manreal.

Matud sa kapitan nga makasalig siya sa iyang asawa ilabi na kabahin sa accounting.

Gibutyag niya nga dihang mibiya si Manreal sa pwesto wala kini mohatag og pormal nga turnover sa mga dokumento sa barangay ilabi na sa mokabat P1 milyon nga budget nga hinabang sa probinsiya kaniadto.

Si Emit nagkanayon nga naglisod siya og pangayo og hinabang sa Kapitolyo tungod kay walay liquidation ang kanhi kapitan kabahin sa nahisgutang kwarta nga gikan sa kagamhanan sa lalawigan.

Tungod kay ang iyang asawa nag-estudyo man og accountancy iya kining gi-hire aron makatabang kaniya pagsulbad sa maong suliran.

Si Emit kinsa ubos sa landong kaniadto sa oposisyon mibali sa administrasyon human siya mapiling kapitan   ug nagkanayon nga tulo lang ka kagawad sa ilang barangay ang iyang kaalyado.

Dihang mibiya si Manreal sa konseho sa barangay may mga misugyot nga ang ihulip niini kauban ra usab sa partido ni Manreal. Tungod kay wa man sila magkasinabot niining problemaha, gusto nalang ni Emit nga magpabiling bakante ang maong puwesto.

“Kung pulihan ang nabakanteng pwesto unya ang mopuli dili pod makahibawo sa iyang trabaho, magsaka kanaog lang unya sa barangay hall aron mokuha sa sweldo maayo pa wala na lang maka-save pa mi sa i-sweldo”, ni Emit pa.

Ang kagawad sa barangay magdawat og P10 mil nga sweldo matag buwan o P120 mil sulod sa usa ka tuig.   - BANAT NEWS