CEBU, Philippines - Nawagtang daw aso ang kinitaan ug ang taxi sa usa ka drayber nga gitulis sa iyang mga pasahero didto sa sitio Hangar, barangay Basak, dakbayan sa Lapulapu sa miaging gabii.
Ang biktima mao si Peter Briones, 40, ulitawo, nga taga barangay Mojon sa dakbayan sa Talisay ug drayber sa Marivic Taxi nga nagdala sa plate number nga GXJ 104.
Si P01 Paulino Galarce sa kapolisan sa Presinto 4 sa Lapulapu Police Station nga nagbase sa barangay Marigondon nga nahinabi sa Banat News mibutyag nga nagtibi ang biktima nga miasoy sa nahitabo kaniya dihang misakay ang babaye ug lalaki nga pasahero sa iyang taxi gikan sa Highway sa dakbayan sa Mandaue.
Unya giingong nagpahatod ang duha ngadto sa barangay Bankal sa maong dakbayan sa alas 12:00 na pasado ang takna sa tungang gabii. Sa ilang pag-abot sa barangay Basak kalit lang gitionan ang drayber sa armas de fuego sa lalaking pasahero nga naglingkod sa iyang luyo uban sa pagdeklarar nga tulis.
Tungod kay wala molihok ang drayber sa kabalaka nga mabungkag ang iyang ulo, milihok usab dayon ang pasaherong babaye nga naglingkod tupad sa drayber sa pagkuha sa kuwarta ug cell phone sa biktima ug dayon gipakanaog kini.
Unya milingkod dayon ang lalaki sa lingkoranan sa drayber dayong pasirit og padagan niini pahilayo sa maong dapit.
Hangtod karon padayon pang gipangita sa kapolisan ang maong sakyanan. - WC (BANAT NEWS)