CEBU, Philippines - Pormal nang milingkod sa iyang katungdanan si retired Sr. Supt. Melvin Gayotin isip Airport Police Department (APD) Manager sa Mactan-Cebu International Airport kagahapon.
Si Gayotin maoy kanhi Cebu City Police Office director sa panahon ni Mayor Tomas Osmeña ug nasuhito na si MCIA General Manager Nigel Paul Villarete sa kinaiya ug performance niini dihang si Villarete mao pay Cebu City administrator.
Si Villarete nanghinaot nga mahapsay na ang mga kalihukan ug operasyon sa mga sakop sa APD ilabi na sa relasyon sa matag usa kanila sama sa nahitabong panag-unay sa mga airport police nga nagpinusilay duha ka semana na ang milabay.
Matud pa ni Gayotin nga usa sa gipatutukan ni Villarete kaniya mao ang pagsumpo sa kurapsiyon sa mga tawo diha sa tugpahanan dili lamang sa APD kundi lakip usab sa mga security guards nga gilambigit sa mga anomaliya.
Giawhag ni Gayotin ang publiko nga modangop kanila kung aduna kini namatikdang kahiwian sa iyang mga sakop aron kahatagan og tukmang aksiyon sa iyang buhatan.
Si Gayotin miretiro sa iyang katungdanan niadtong milabay’ng Oktubre 23 sa pangidaron nga 56 anyos ug gikuha kini dayon ni MCIA GM Villarete nga moserbisyo sa MCIA-APD. (BANAT NEWS)