Bombo Radyo Academy mag-reunion

CEBU, Philippines - Sa unang higayon sa kasaysayan sa panibya ang mga kanhing kawani sa Bombo Radyo Cebu nga anaa na sa nagkadaiyang sibyaanan, telebisyon ug pamantalaan mopahigayon og usa ka reunion. Karong Oktobre 29, 2011 ang “Bombo Radyo Academy 1st Grand Reunion 2011” himuon sa Executive Hall sa Ecothec Center sa Sudlon barangay Lahug dakbayan sa Sugbu alas 4:00 sa hapon.

Sa maong kalihukan magtagbo ang tanang mga kanhing managers, anchormen, reporters, drama talents ug mga empleyado sa sibyaanang Bombo Radyo Cebu.

Ang miorganisar niini mao ang Bombo Radyo Academy Executive Committee pinangulohan ni kanhi Assistant Station Manager Elena Pelobello, Assistant Station Manager Bong Soriano, Newscaster Emie Matis Gabito, Anchorman/Reporter Rommel Manlosa, Reporter Flor Perolina ug News writer Jessa Ortiz Romagos.

Ang pagpahigayon sa reunion gihimo aron ipakita ang panaghiusa sa mga kanhing empleyado bisan pa nga atoa na sila magserbisyo sa ubang media outfits ug ubang matang sa panginabuhian.

Daghang mga reporters sa Sugbu ang naggikan sa Bombo Radyo-Cebu diin sila nahashas.

Gikatakdang adunay himuong mga proyekto ang grupo ingon man ang pagpili unya sa bag-ong set of officers.

Ang mga haligi sa Bombo Radyo Cebu kaniadto nga atoa na sa ubang media outfits nga sila si kanhi Visayas Area Manager Jenil Demorito, kanhi Station Manager Manny delos Santos Rabacal, Station Manager Jojo Solante, ug kanhi Assistant Station Manager Bobby Nalzaro mipadayag na sa ilang pagsuporta sa maong kalihukan ug sa kalampusan niini.

Gumikan niini giawhag ang tanang mga kanhing empleyado sa Bombo Radyo Cebu sukad sa katukoran niini sa pagsalmot sa maong kalihukan ug magparehistro. 

Mahimo kini nga motawag sa telepono 2314820 ug kontak ni Elena Pelobello o 5818876 ni Bong Soriano alang sa dugang kasayuran. Ang reunion sa Bombo Radyo Academy 2011 walay labot ang kasamtangang tagdumala sa Bombo Radyo Cebu sanglit gimugna kining exclusive lamang sa mga kanhing kawani sa Bombo Radyo Cebu ug sa Executive Committee sa Bombo Radyo Academy 2011. (FREEMAN)