Katungod sa estudyante tahuron

CEBU, Philippines - Pabor si Representante Gabriel Luis "Luigi" Quisumbing sa sixto distrito sa lalawigan sa Sugbo nga hatagan og gibug-aton sa kagamhanan ang katungod ug kaayohan sa mga estudyante lukop nasud.

Kini ang nag-unang hinungdan nga mipirma si Quisumbing sa giduso nga House Bill 2190 nga may ulohan: “ An act providing for a national policy on Students’ Rights and Welfare”, nga gipangamahanan nila ni Representative Walden Bello and Kaka Bag-ao.

Sigun pa ni Quisumbing nga ang maong balaudnon magsugyot og mga kausaban ug maglig-on sa katungod ug kaayohan sa mga tinun-an sama sa pag-ila ug pagtanyag sa "campus rights and freedom" nga gihatag sa batakang balaod.

Pagkontrol sa pagsaka sa tuition ug ubang mga bayronon, pagsilot sa malapason sa katungod sa mga tinun-an ug pagpalig-on sa kapasidad ug gahum sa mga ahensya nga may labot sa edukasyon.

Si Quisumbing nagkanayon nga dugay nang gikinahanglan ang maong proposal alang sa kaayohan sa mga tinun-an.

“Although many schools recognize students’ rights and welfare, this bill will institutionalize the right to student representation; the right to school publication and information; freedom of peaceful assembly and expression; and sundry rights guaranteeing benefits like student counseling and adequate school facilities’ sigun pa ni Quisumbing.

Ang representante sa ika-unom nga distrito ning lalawigan midugang nga ang maong balaodnon makatabang sa paghatag og kasigurohan sa tanang mga tinun-an nga mapahimuslan niini ang katungod sa kaangayan ug kagawasan gikan sa diskriminasyon gumikan sa kakabus, kahimtang sa panglawas, politikanhon ug relihiyusong pagtuo, ug uban pa. Miingon si Quisumbing nga kun mahingpit na kining   balaod, labi nang malig-on ang pagkabutang sa estudyante sa ilang pagtungha nga makasalig na sila sa kagamhanan nga moprotiher kanila sa hingpit sa tanang panahon sa ilang pag-eskuyla.  - BANAT NEWS