CEBU, Philippines - Gidakop ug gipasakaan og kasong pagpanglugos ang usa ka lalaki nga giingong milugos sa 16 anyos nga dalagita nga iyang silingan didto sa barangay Matab-ang sa siyudad sa Toledo niadtong Miyerkules sa alas 8:00 sa gabii.
Ang biktima nga gitago lang sa ngalang Inday (kansang tinuod nga ngalan gipugngan) 16, nga taga Matab-ang, samtang ang suspek mao si Cresencio Loway Gabasa, hingkod, nga silingan sa biktima.
Subay sa inisyal nga imbistigasyon sa Matab-ang Police Sub-station midangop ang inahan sa biktima ngadto sa ilang buhatan kauban ang biktimang anak niini
Gibutyag sa inahan nga sa nahisgutang higayon giingong gipugos sa suspek pagdala ang iyang anak sa kalibunan ilawom sa palm tree plantation nga may gilay-on gikan sa ilang balay ug didto giingong gihinol ang kinatawo niini ug uban pang pribadong bahin sa lawas sa biktima ug pagkahuman gipahimuslan.
Nasayran nga walay nakapakgang sa gibuhat sa suspetsado ngadto sa biktima tungod kay ang mga ginikanan niini wala sa ilang balay niadtong tungora.
Wala usab makasinggit pagpangayo og tabang ang biktima tungod kay gihulga kini sa suspek nga patyon.
Atol sa gihimong operasyon sa kapolisan nasikop ang suspek ug kagahapong adlawa pormal nang napasaka ang kasong pagpanglugos batok niini didto sa Toledo City Prosecutors Office samtang nagkagulkol kini sa prisohan. (BANATNEWS)