Luigi miawhag Mactan airport ipa-upgrade

CEBU, Philippines -  Samtang uyon si 6th district Congressman Gabriel Luis Luigi Quisumbing nga ibalhin ang Mactan Cebu International Airport sa lungsod sa Cordova, apan iyang giklaro nga ang labing angayan nga himuon karon sa kagamhanan sa labing daling panahon mao ang pag-upgrade sa airport sa Mactan.

Kini tungod kay nahadlok siya nga motidlom ang kapabilidad sa Mactan airport kun dili matuman niini ang international standard alang sa usa ka international airport.

Matud pa ni Quisumbing nga dili siya buot nga ang nahitabo sa international airport sa Manila nga na-down grade tungod kay wala mapalambo ang facilities niini, mahitabo usab dinhi sa tugpahanan sa Mactan.

Si Quisumbing mipahibawo nga naningkamot usab siya karon nga mapadali ang tinguha sa kagamhanang national nga ma-upgrade ang facilities sa MCIA aron matubag ang gikinahanglan nga international standard sa airport. Hinuon giklaro sa kongresista nga bisan og kulang ang facility sa MCIA, kasaligan ang katakus ug ang naangkon nga mga skills sa mga security personnel niini kay nakasanta man kini sa mga kontrabando nga gipalusot sa tugpahanan sa Mactan sa miaging adlaw. (BANAT NEWS)