BDB rescue drill ilusad karong adlawa

CEBU, Philippines - Mopakita sa ilang mga nakat-onan sa gipahigayong mga pagbansaybansay ang mga sakop sa Barangay Disaster Brigade sa 27 ka barangay sa dakbayan sa Mandaue sa reclamation area.

Kini himuon human sa fun run nga gipasiugdahan sa mga sakop sa Emergency Rescue Unit Foundation (ERUF) isip kabahin sa maong kalihukan.

Si Mandaue City Administrator James Abadia mibutyag nga naglakip sa ipasundayag sa mga sakop sa Barangay Disaster Brigade mao ang urban search and rescue drill, mass casualty, air crash drill ug fire fighting.

Si Abadia miingon nga bukas sa publiko nga gustong motan-aw ang maong kalihukan sugod alas 6:30 sa buntag nga diin pormal nga sugdan ang ERUF 161 Run nga pagahimuon sa reclamation area ug paingon ngadto sa Parkmall sa maong dakbayan.

Ang ERUF 161 Run adunay 6k, 3k ug 2k nga kategoriya ug tapuson sa usa ka dinner program ug paghatag og pasidungog sa mga donors sa ERUF sulod na sa 25 ka tuig nga gidugayon nga pagpangalagad sa mga Sugboanon. - Romeo T. Limpangog/EIM (FREEMAN)