Comendador mipaimbistigar ni Melodia

CEBU, Philippines - Gipa-imbestigar na ni Sr. Supt. Patrocinio Comendador, director sa Cebu Provincial Police Office (CPPO) nga nakakita og rambol batok sa mga sakop sa Squatters Prevention Encroachment and Elimination Division (SPEED) sa dalan Mango Avenue ning dakbayan sa Sugbo niadtong Lunes sa gabii.

Matud ni Comendador nga iyang gisugo si Insp. Julius Ompad ang hepe sa Provincial Investigation and Detective Management Branch (PIDMB) sa pagsusi kang PO1 Darwin Melodia kinsa nadetiner didto sa Fuente Police Station niadtong higayona apan gibuhian dayon kini niadtong Martes sa buntag.

Si Melodia kinsa nadestino sa Tuburan Police Station gipasanginlang hubog ug giingong nangulata sa duha ka sakop sa SPEED.

Nasayran nga ang lasbag nga si Melodia nangimbistigar   kuno sa mga sakop sa SPEED kinsa namadlong sa mga vendor sa maong lugar kay nakahasol sa mga motorista nga maoy sinugdanan sa ilang lalis.

Gumikan kuno sa kainit sa ulo sa polis, giingong gipikhan sa iyang mga kumo ang mga sakop sa SPEED busa nangawingig ug nangabun-og ang mga biktima.

Apan tungod kay misukol ang    taga SPEED sa maong polis nahiagom usab ang naulahi sa paghuboy sa iyang dagway kay nakulatahan usab siya sa iyang mga kontra. 

Gumikan niini si Noel Artes nga maoy hepe sa SPEED mibahad nga pasakaan nila og kaso si Melodia kay gusto nilang madubok kini sa prisohan.

Hinuon matud pa ni Comendador nga kun mamatud-an nga nakasala si Melodia dili kini makapaabot og tabang gikan kaniya.  - BANAT NEWS