Towing company sa Mandaue andam motubag

CEBU, Philippines - Wala mabalaka ang kadagkoan sa Jadewell Parking System Corporation sa rekomendasyon sa city legal office sa Mandaue ngadto kang Mayor Jonas Cortes sa pagpahunong na sa ilang kontrata sa pagdakop sa mga ilegal nga nag-parking nga mga sakyanan.

Si Rogelio Tan nga maoy tag-iya ug presidente sa Jadewell Parking System Corporation nga nahinabi sa Banat News miingon nga andam nilang tubagon ang mga gialegar nga kalapasan nga ilang nahimo nga maoy gibasehan sa rekomendasyon sa city legal sa Mandaue.

Gitataw ni Tan nga dili mahiklin ang katahap nga adunay mga opisyal sa dakbayan nga motambag kang Cortes sa pagpahunong sa ilang kontrata sa tumong nga maoy ihulip ang ilang mga higala.

Matud pa niya nga milungtad na og kapin sa pito ka tuig ang ilang operasyon sa ilang kompaniya ug dili na usab bag-o alang kanila ang mga reklamo nga sagad gipatugbaw gikan sa mga tawo nga ilang madakpan tungod sa kalapasan nga nahimo.

Dugang pa niya nga sukad sa paggawas sa maong isyu sa mga pamantalaan labot sa pagpahunong sa kagamhanan sa ilang operasyon wala pa sila makadawat og pahibalo alang sa pormal nga pagtubag niini.

Si Lim mipasabot nga dili na angay katingad-an nga masuko ang mga tawo nga ilang madakpan kinsa maoy magpahaba sa pagsumbong ngadto sa mga opisyal sa kagamhanan sa maong dakbayan.

Gipasabot niya nga dili sila supak sa paagi sa buhatan sa tresurero sa dakbayan nga 50 ka stubs sa mga resibo ang i-release ngadto kanila ug   laing 50 niini ihatag usab sa higayon nga ma-remit na ang nagamit nilang resibo.  - BANAT NEWS