Cybersex sa siyudad gipanid-an

CEBU, Philippines - Miawhag ang Cebu City Anti-Indecency Board (CCAIB) ngadto sa mga opisyales sa barangay nga hingusgan ang paggukod sa mga tawong nalambigit sa cybersex.

Nagkanayon ang tsirman sa CAIB nga si Dr. Lucille Mercado nga dako og papel ang mga opisyales sa barangay sanglit sila maoy unang makahibalo sa gipamuhat sa ilang mga konstituwente.

Gitino ni Mercado nga duna siya’y nadawat nga report nga dunay cybersex den dinhi sa siyudad sa Sugbo apan ila pa kining ipa-verify.

“Kasagaran man gud ana, kay tago-tago na sila mag-operate, maong nagpatabang ta sa barangay nga mo-report sa atong office kung makadungog sila nga dunay nibuhat ana sa ilang lugar,” matud pa ni Mercado.

Usa usab sa gipanid-an karon ni Mercado ang mga internet café nga nagbutang og mga pribadong lawak nga posibleng diin buhaton ang cybersex.

Kahinumduman nga miinit ang maong isyu human duna na’y nasakpan nga gibuhat niini sa lungsod sa Cordova busa gipaningkamotan karon sa kagamhanan sa siyudad sa Sugbo nga dili kini mahitabo sa atong dapit. (BANAT NEWS) 

Show comments