CEBU, Philippines - Aprobado na sa ika-tulo ug katapusang pagbasa sa ubos balay balaoranan ang balaodnon nga maghatag sa batakang benepisyo sa mga napiling mga konsehales lukop nasud.
Sumala pa ni Konsehal Ronald Carcellar sa lungsod sa Poro, Isla sa Camotes ug kasamtangan usab nga National Executive Vice President sa Philippine Councilors’ League nga ang mga batakang benepisyo nga mapahimuslan unya sa mga napiling konsehal ubos sa nahisgutang balaodnon naglangkob sa Civil Service Eligibility, Education Program , ug GSIS Insurance.
Matud pa ni Carcellar nga nagpasalamat kaayo siya sa pipila ka mga Sugboanong kongresista nga misuporta sa pagpasar sa maong balaodnon ilabina kang 3rd district Congressman Pablo John Garcia.
Gipasabot ni Carcellar nga naluoy kaayo siya sa ubang mga konsehal nga nakahuman na sa ilang tulo ka termino sa pagkakonsehal apan wala makatrabaho og tarong sa gobyerno sanglit wala sila kahatagi og civil service eligibility hinungdan nga nagpabiling contractual employee sa gobyerno samtang ang uban mibalik sa pagka- drayber sa tricycle ug habalhabal.
Gawas pa niini gisugdan na usab karon ang education Program sa Councilors Legislative Academy sa kaulohan alang sa mga konsehal nga wala makahuman sa pagtungha sa kolehiyo. (BANAT NEWS)