CEBU, Philippines - Gikatakda nga mobisita karong adlawa si Association of Barangay Councils (ABC) President Michael Ralota sa buhatan sa City Accounting Office aron mapangitaan og kasulbaran ang dul-an sa P30 milyones nga mga transaksyon nga gisudlan sa mga barangay ngadto sa siyudad nga gikuwestiyon sa Commission on Audit gumikan sa kakuwang sa mga dokumento niini.
Walo ka barangay ang gisusi karon sa COA gumikan pag-release nila og pundo bisan daghang kuwang sa mga supporting documents ingon man vouchers.
Ang gikwestyong mga barangay mao ang Pasil, Suba, Agsungot, Banilad, Sawang Calero, Sirao, San Antonio ug San Roque.
Ang kapitan sa Agsungot nga si Pastor Alcover II mipadayag nga kompleto ang ilang mga dokumento ug nagduda siya nga basin napasa-pasa na sa laing opisina sa gobiyerno ang ilang mga papeles tungod sa pag-ilis-ilis og mga tawong mohawid sa papeles
Ang kapitan sa Sirao nga si Felix Limotan mipadayag nga kompleto ang ilang mga vouchers. Si kapitan Rogelio Ruizo sa San Roque nagtoong wala lang kini mautingkayi ang ilang gisumitir nga dokumento. (BANAT NEWS)