CEBU, Philippines - Nabun-og ang usa ka sakop sa City Anti-Illegal Drugs Special Operation Task Force (CAIDSOTF) sa Lapu-Lapu City Police Office atol sa usa ka buy bust operation hinungdan nga nakaeskapo ang suspetsado didto sa barangay Pajo, dakbayan sa Lapu-Lapu sa milabay’ng gabii.
Alas 8:45 sa milabay’ng gabii mipahigayon og buy bust operation ang mga sakop sa CAIDSOTF pinangulohan ni Inspector Glenn Hife sa panimalay ni Frederick Booc, hingkod ang panuigon, residente sa maong dapit ug tag-iya sa usa ka iladong guitar factory sa siyudad.
Si Booc gidudahan nga namaligya og ilegal nga drugas.
Atol sa maong operasyon nasikop si Booc uban sa nakuhang 30 ka gagmay’ng paketeng shabu.
Apan gumikan sa pagbabag sa iyang mga paryente ug mga silingan nahitabo ang karambola tali sa polis ug sa suspetsado hinungdan nga nakaeskapo kini.
Hinuon si Hife wala mobutyag kung kinsa sa iyang mga sakop ang nabun-og sa maong operasyon apan mibahad kini nga mopasaka og kaso batok sa mga responsable sa nahitabo sa iyang tawo.
Samtang si Lapu-Lapu City Police Office Director Senior Superintendent Anthony Obenza mimando na sa iyang mga sakop sa pagsusi kung kinsa ang mga paryente ni Booc nga nalambigit sa maong pagpangulata sa iyang polis aron mapasakaan og kaso. (BANAT NEWS)