Dolphin nga naputla'g ikog gidagsa

CEBU, Philippines - Patay nang napalgan sa mga mangingisda ang usa ka dolphin nga gidagsa sa baybayon sa Maribago dakbayan sa Lapulapu kagahapon sa buntag.

Matud pa ni Maribago barangay Kapitan Joseph Pangatungan nga nagduda siyang dugay nang namatay ang maong mananap gumikan kay nabaho na kini.

Nagduda usab sila nga naligsan sa barko ang maong isda gumikan kay naputol ang ikog niini hinungdan sa iyang kamatayon.

Ang maong dolphin adunay gitas-on nga duha ka dupa gikan sa simod hangtud sa putol na nga ikog niini.

Gumikan niini gipasidan-an ni Pangatungan ang iyang mga konstituwente nga dili kan-on ang maong isda gumikan kay dugay na kining patay ug baho na.

Pipila ka mga residente ang nagtapok sa baybayon aron mangayo og tipik sa unod sa maong isda aron ilang isud-an, apan gibadlong sila sa mga sakop sa Bureau of Fisheries and Aquatic Resources.

Matud pa ni Pangatungan nga ilang ipalubong ang maong dolphin o dad-on sa mga sakop sa BFAR ngadto sa layong dapit ug ilubong.   - (BANAT NEWS)