CEBU, Philippines - Patay ang duha ka mga trabahante samtang naangol ang ilang agalong babaye human kalit gipamusil sa mga armadong lalaking nag-motor diha sa barangay Talamban kagahapon sa hapon.
Ang namatay diha-diha mao sila si Randy Librando, 39, taga barangay Basak sa dakbayan sa Mandaue ug Dioscoro Abendan, 45, taga barangay Arpili sa lungsod sa Balamban samtang atol ning pagsuwat sa balita anaa pa sa North General Hospital ang ilang agalong si Thelma Ygot tungod sa samad pinusilan.
Si Ygot maoy tag-iya sa Talamban Glass Supply nga nahimutang diha sa sitio Kalubihan sa maong barangay.
Duha ka wala mailhing mga lalaki ang gitumbok nga gunmen nga nagsuot og sunglasses samtang aduna silay ikatulong kauban nga maoy drayber sa gisakyang itom nga motorsiklo.
Matud pa unang gipusil si Librando nga drayber sa maong establisamento ug gisunod dayon si Abendan kinsa glass installer sa maong tindahan ug igsuon ni Ygot kinsa misuway unta og ilog sa armas sa gunman nga padulong kang Ygot.
Daghang mga basiyo sa kalibre .45 nga bala ang nakaplagan sa mga imbestigador diha sa crime scene
Samtang wala pay klarong gitumbok nga motibo sa maong krimen, ang hepe sa Talamban Police Station nga si Sr. Insp. Ranulfo Espina sa report sa TV Patrol Central Visayas mibutyag nga aduna silay pagdudang posibleng ‘love triangle’ ang motibo.
Matud pa sa maong report gikan gihapon sa pamahayag ni Espina napusilan usab kaniadto ang bana ni Ygot.
Si SPO2 Rey Cuyos, ang pangulo sa mga imbestigador sa Homicide Section nga nagkupot sa maong kaso sa pakighinabi sa Banat News nagkanayon nga base sa pasiuna nilang nakuhang impormasyon napusilan ug namatay ang bana ni Ygot kaniadto.
Usa sa ilang gisusing anggulo karon mao ang love triangle base usab sa mga impormasyong nakuha sa kapolisan. (EIM) (BANAT NEWS)