Suansing misusi sa black corals

CEBU, Philippines -  Gipangunayan ni Bureau of Customs Deputy Commissioner Horacio “Toto” Suansing, Enforcement and Security Services (ESS) Director Gen. Nestorio Gualberto ug Cebu Customs District Collector Atty. Ronnie Silvestre ang pag-inspeksyon sa P15 milyones nga balor sa “Black Fan Corals” nga nakumpiskar sa mga sakop sa Customs Cebu.

Personal nga giablihan ni Suansing ang usa ka 20-footer container van nga adunay sud nga 150 ka sakong “Black Fan Corals” nga gikan sa Zamboanga City nga gipayuhot dinhi sa Sugbu niadtong Mayo 19, 2011.

Atol sa press conference, si Suansing midayeg sa BOC sa Cebu sa pagkasikop sa maong mga sea corals.

Matud pa ni Gualberto nga ang maong shipment didto unta kini padung sa kaulohan apan sa pag-agi dinhi sa milabay’ng mga semana duha ka mga container vans ang nasakmit sa mga sakop sa BOC- Manila nga gikan sa Zamboanga ug ang consignee mao si Exequil Navarro nga gipaubos karon sa imbestigasyon.

Nagduda ang mga opisyal sa Customs nga ang nakumpiskar sa BOC- Cebu usa ra ang tag-iya sa maong mga corals. Samtang si Jerry Arizabal sa ESS-Cebu human nila madawat ang impormasyon gikan sa kaulohan nga dunay miliko nga kargamentong gidudahang kontrabando gipanid-an nila dayon ang mga mangabot nga barko hangtud nga nakakuha sila og impormasyon sa pag-abot niini dinhi niadtong Mayo 19.

Nasuta usab nga “fictitious” ang consignee niini nga Cebu Junk shop ug ang shipper hinungdan nga hangtod karon wala pa nila masayri kung kinsa gyud ang tag-iya sa maong mga corals. Matud pa ni Suansing nga ang mga residente sa dapit diin gikuha ang maong mga corals maoy mitug-an sa mga awtoridad   kabahin sa pagpanguha niini sa ilang kadagatan.

Gibanabana nga 70 ngadto sa 100 na ka tuig nga mitubo ilawom sa kadagatan ang matag punoan sa maong gasang nga gipanguha.

Gani atol sa usa ka “privilege speech” ni Senador Juan Miguel Zubiri sa milabay’ng gabii kini mipasupot sa iyang lakang sa pagpaimbestigar sa buhatan sa BOC ug sa kalambigitan sa mga lokal opisyal sa gigikanan sa maong corals.(EIM)(BANAT NEWS)