CEBU, Philippines - Usa ka 13-anyos nga tinun-an sa grade two ug ang ig-agaw pulos angol human sila panunggaba sulod sa diskohan sa Sitio Kalapukan, sa barangay Tisa siyudad sa Sugbo sa miaging kaadlawon.
Hinuon ang suspetsado nga si Jerome Abella, 21, misurender sa kapolisan.
Ang biktima si Junard 13, kansang tinuod nga ngalan gipugngan sa Banat News ug ang ig-agaw niini nga si Danilo Ygonia nga mitambong sa disko atol sa pista sa maong lugar.
Subay sa pasiunang imbestigasyon sa kapolisan nasayran nga si Abella giingong nagdumili pagpasulod sa diskohan sa 13-anyos nga biktima hinungdan nga nasuko kini. Si Ygonia kinsa diha niadtong higayona gikomprontasi ang suspetsado hangtud nga sila nagkalalis ug misangko sa kagubot.
Sa tantong lalis milanit si Abella sa gitangkil niining kutsilyo ug diha-diha gihansak kini sa dughan ni Ygonia ug gisunod dayon pagluba si Junard ug naigo sa walang bahin sa lawas niini.
Human sa maong hitabo, si Abella giubanan sa iyang amahan nga si Candido Abella sa pagtahan ngadto kang SPO2 Crecente Dacillo sakop sa Punta Princesa Police Station kinsa maoy unang miresponde sa hitabo. Si SPO2 Rogelio Nedamo sa Homicide Section nagkanayon ila nang giandam ang tukmang kaso nga posibling ipasaka karong adlawa batok sa suspetsado. (BANATNEWS)