Magtiayong Radaza nagkasumpaki sa RH Bill

CEBU, Philippines -  Bisan mipirma pabor sa RH Bill si Lapulapu City Congressman Arturo “Boy” Radaza apan nagpabiling supak si Mayor Paz Radaza sa issue kalabot sa RH Bill nga gilantugian sa mga magbabalaod.

Sa milabay’ng Biyernes si Mayor Radaza giduaw sa mga madre ug sakop sa Pro-Life International uban sa presidente nga si Dr. Rene Joseph Bullecer.

Didto gipadayag ni Mayor Radaza nga siya usa ka Pro-Life crusader ug andam siya nga mosuporta sa pagsupak sa RH Bill nga gibarugan sa mga Pro-Life.

Gani sa pagpamatuod niini gitugotan niya ang mga sakop sa pro-life group nga magbutang og streamer uban sa hulagway ni Blessed Pope John Paul II nga nagdala sa tema nga “Filipinos rejects life, Filipinos rejects RH Bill”. 

Gumikan niini gikalipay ni Dr. Bullecer ang suporta nga gihatag ni Mayor Radaza ngadto kanila ug nanghinaut kini nga dako og ikatabang si Radaza sa pagpasabot ngadto sa mga Oponganon kalabot sa maong balaodnon. (BANAT NEWS)