CEBU, Philippines - Gi-awhag ang Department of Interior and Local Government (DILG) sa pagpalig-on sa implementasiyon sa Barangay Anti Drug Abuse Council (BADAC) sa kabarangayan lukop nasud aron molig-on ug mas epektibo ang kampanya batok sa gidiling drugas.
Si kanhi Dangerous Drugs Board (DDB) Undersecretary Paul Clarence Oaminal mihagit kang Interior Secretary Jessie Robredo nga manduan ang tanang regional directors pag-monitor kun pabilin pa bang aktibo ang BADAC sa kabarangayan.
Gisugyot usab ni Oaminal nga himuong ‘under oath’ ang ipadangat nga report sa BADAC aron pagsiguro nga tinuoray gyud kini ug walay pagpuno-puno nga gihimo aron mahibaw-an ang tinuoray’ng estado sa suliran sa gidiling drugas sa usa ka lugar.
Gipasabot ni Oaminal nga ang barangay maoy ‘first line of defense’ ug lig-ong kahimanan sa kampanya batok sa gidiling drugas ug angay lang nga palig-unon ang sirkular sa katukoran niini. Namatikdan ni Oaminal nga sa pagkakarun sagad sa anti drug abuse council sa lain laing lugar dili na kaayo aktibo tungod usab sa kakuwang ug dili pagseryoso sa DILG pagpatuman sa mga giluwatan niining circular.
Matud pa ni Oaminal nga kun dili nila mapalig-on ang ilang circular kabahin sa BADAC mas maayo pang wagtangon nalang kini ug ipokus sa ubang programa ang pundo alang niini. (BANAT NEWS)