CEBU, Philippines - Ipahigayon karong adlawa (Huwebes) sa committee on laws sa konseho sa dakbayan sa Talisay ang public hearing kabahin sa pag-amendar sa section 2 sa City Ordinance No. 92-03.
Ang nahisgutang ordinansa mao ang “an ordinance regulating the issuance of motorized tricycle operator’s permit (MTOP) and the operation of tricycle for hire”.
Ang Section 2 sa nahisgutang ordinansa mao ang bahin sa pagdestino og rota sa matag traysikol sa dakbayan.
Kaniadto dili tanang rota sa traysikol ang molahos sa barangay Lagtang apan karon tanang rota palahuson na ngadto sa barangay Lagtang nga nahimutangan sa bag-ong merkado publiko sa siyudad.
Kahinumdoman nga bag-o pang gipatas-an ang plitehan sa traysikol ngadto sa P8 gikan sa P6.
Ang mga rota gikan sa barangay Bulacao paingon sa Lagtang, Dumlog paingon ngadto sa Lagtang, San Isidro paingon sa Lagtang, Candulawan paingon sa Lagtang, Lawaan I, II, ug 3 paingon sa Lagtang ug Mohon paingon sa Lagtang ang pletehan P8 lang.
Ang biyahe gikan sa Biasong paingon sa Lagtang, Pooc ngadto sa Lagtang, San Roque ngadto sa Lagtang, Tanke via Kimba ngadto sa Lagtang, Cansojong via Kimba ngadto sa Lagtang, Cansojong via Poblacion ngadto sa Lagtang, Poblacion ngadto sa Lagtang ug Linao ngadto sa Lagtang ang plete P9.
Ang mga traysikol nga wala marehistro dili makapaningil sa bag-ong mga taripa kay dakponon kini. (BANAT NEWS)