CEBU, Philippines - Nagtingkagol karun sa karsel ang usa ka batan-on human ‘nangamang’ sa usa ka tinun-an sa grade 5 nga silingan ala-una sa kaadlawon niadtong Sabado sa usa sa mga barangay sa lungsod sa Moalboal.
Ang biktima nagpangidaron og 11-anyos ang gipahimuslan sa hubog niyang silingan nga si Francis (ngalan gipugngan aron di mailhan ang biktima), 21 molupyo sa maong lugar.
Sa pakighinabi sa Banat News ni PO2 Edwin Illut, ang tourist police sa maong lungsod kini mibutyag nga ang inahan sa biktima midangop ngadto kanila ug nagpakitabang human ang iyang anak gipahimuslan.
Pasado alas-2, nasikop si Francis kinsa sumala pang Illut nagmagahi pa pagkuyog kanila tungod sa pangangkong gikapoy kini ug gustong matulog.
Samtang si PO2 Jennelyn Awe, Women’s Desk sa Moalboal Police, mibutyag sa Banat News nga nahitabo ang pagpanglugos samtang natulog ang biktima sulod sa ilang panimalay.
Giingong misulod ang suspetsado sa balay nga wala mamatikdi ug milugos sa bata apan gani mao nalay namat-an sa biktima nga wala na siya’y sapot ug nagpatong na kini kaniya. Ang bata daling milugnot ug midagan sa lawak ug nanirado, ang suspek dali usab nga mibarog ug mikaratel og dagan.
Ang kapolisan nagpaabot pa sa resulta sa eksaminasyon sa bata pagtino kung nahilabtan ba gyud kini. - BANAT NEWS