CEBU, Philippines - Tulo ka posibleng kaso ang atubangon sa usa ka polis sa lungsod sa Argao nga nasakpan sa asawa nga nakigdulog sa iyang kabit ug ang giingong paggamit niini og illegal nga drugas.
Kalapasan sa RA 9262 or Anti-Violence Against Women and their Children Act of 2004 ang gipasakang kaso ngadto sa Provincial Prosecutor’s Office ug Administrative case alang sa grave misconduct nga gisang-at usab sa Police Regional Office-7.
Ang Provincial Investigation and Detective Management Branch (IDMB) misang-at usab og kasong kalapasan sa Section 15 sa RA 9165 kon Violation of the Dangerous Drugs Act of 2003 human masuta nga ang maong polis positibo sa paggamit og illegal nga drugas.
Si PO1 Benard Banogon, 30, nga nadestino sa Argao Police Station gidakop sa kapolisan sa lungsod sa Sibonga human siya hisakpi sa iyang asawa sa akto sa iyang pakigdulog sa iyang kabit sulod sa ilang balay didto sa barangay Bahay, Sibonga niadtong Huwebes sa buntag.
Ang iyang kabit gilakip sa pagdakop sa kapolisan ug gidala sa Police Station samtang si Banogon gidala ngadto sa Philippine National Police Crime Laboratory alang sa random drug test niadtong adlaw sa iyang pagkasikop.
Si Insp. Lamberto Hibaya, sa PIDMB nagkanayon nga si Banogon nakalapas sa Rule 21 sa Section 1 (3) sa National Police Commission (Napolcom) Circular 2007-001.
Ang asawa sa polis mitug-an nga ang iyang bana mi-prenda sa iyang service firearm nga M-16 ug .45 nga kalibre aron lang ipalit og drugas, apan ang maong armas gikuha sa hepe sa Argao nga si Sr. Insp. Wilbert Parilla.
Si Banogon gikatahong Absent Without Official Leave (AWOL) sukad pa niadtong bulan sa Enero ning tuiga.
Siya ug iyang asawa wala sa maayong kabubot-on sukad pa sa miaging tuig human hisayri sa naulahi nga adunay gikabuangang babaye ang iyang bana ug ang padayong paggamit niini sa illegal nga drugas. (BANAT NEWS)