CEBU, Philippines - Mibahad ang kagamhanan sa dakbayan sa Sugbo nga kadtong malapason sa balaod sa basura pasakaan og sumbong ngadto sa hukmanan aron kasilotan.
Kini samtang mikabat na sa 351 ang naluwatan og citation ticket gumikan sa kapakyas pagtuman sa “No Segregation, No Collection Policy” sa siyudad sa Sugbo.
Daan nang nalista ang 248 ka mga malapason ang natala sa unang semana sa buwan sa Abril human sugdi ang pagpatuman sa maong balaod niadtong Abril 1 ug nag-anam kadaghan samtang nagdagan ang adlaw.
Sa maong gidaghanon, 35 pa lang ang nakabayad sa violation fee nga P500 ug ang wala kabayad, gihatagan og usa ka buwan nga tagal hangtod nga kabayran nila ang maong paglapas.
Ang chairman committee on environment sa konseho nga si Konsehal Nida Cabrera nagkanayon nga kadtong dili makabayad sa ilang obligasyon pasakaan gyud nila og kaso ngadto sa korte.
Miingon si Cabrera nga tumanon nila ang gimando sa balaod sama sa gitakda nga silot sa mga tawo nga nakasupak sa Ecological Solid Waste Management Act of 2000 kon Republic Act No. 9003.
Samtang si Mayor Michael Rama nagkanayon nga dako kaayo og responsibilidad ang mga opisyal sa barangay sa pagpanghingusog sa maong kampanya.
Gipadayag usab ni Rama nga dako kaayo og papel ang media sa pagpakatap sa impormasyon kalabot sa maong palisiya. Nasayran nga aduna pa’y mga barangay karon nga nagpabiling hugaw gihapon nga lantawon gumikan sa nagpasad nga mga basura sa kadalanan.
Nagkanayon si Rama nga kinahanglang mahipos dayon kini gumikan kay makaapekto ang baho niini sa kalihokan sa turismo sa siyudad.
“Kung hugaw kaayo ang usa ka lugar, kinsa pa may mga turista nga ganahan mosuroy sa atong lugar,” matud pa sa mayor.
Hangtud karon pabilin nga naglibot-libot sa nagkadaiyang sitio sa matag barangay ang mga sakop sa barangay environmental officers (BEO).(WC) (BANAT NEWS)