CEBU, Philippines - Gisusi sa mga sakop sa Investigation Detection and Management Bureau (IDMB) sa Mandaue City Police Office (MCPO) ang nahitabong pagpanglungkab sa sales office sa San Miguel Brewery sa barangay Tipolo, dakbayan sa Mandaue nga maoy hinungdan sa pagkahanaw sa mokabat P304,820 nga kantidad nga salapi niini.
Si Kristine Rosacena nga maoy cashier sa buhatan sa maong establisamento nga gisukitsukit sa mga imbestigador sa IDMB nga gipangulohan ni Inspector Ramil Morpos, deputy chief sa maong buhatan sa MCPO miasoy nga alas-7 sa buntag niadtong miaging adlaw ilang nadiskubrehan nga gilungkab na ang vault sa ilang buhatan.
Dugang pa ni Rosacena nga walay laing tawo sa sulod sa ilang buhatan dihang ilaha kining nadiskubrehan.
Gitug-an ni Rosacena nga sa miagi pang bulan nga depektoso ang kandado sa ilang safety vault nga maoy hinungdan nga dali lamang kaayong naabli sa kawatan ug gikuha ang maong kantidad.
Si Morpos miingon sa kasamtangan nagpadayon pa ang ilang pakisusi alang sa pag-ila sa mga kawatan. - BANAT NEWS