Kano napalgang patay sa lawak

CEBU, Philippines - Napalgang patay sa sulod sa lawak sa gipuy-ang panimalay ang usa ka Amerikano alas-8 pasado ang takna sa miaging gabii sa Helen Ville Subdivision sa barangay Pajac, dakbayan sa Mandaue.

Ang namatay mao si Jerom Henry Schover, 53, nag-abang sa maong dapit.

Si PO2 John Carlo Jocotan sa Homicide Section sa kapolisan sa maong dakbayan miingon nga ilang nadawat ang tawag sa telepono sa mga sakop sa Emergency Rescue Unit Foundation (ERUF) sa barangay Pajac sa maong dakbayan kabahin sa maong langyaw nga napalgang patay.

Matud pa ni Jocotan nga ang patay’ng lawas sa maong langyaw napalgan nga nag-ubo sa sofa nga nagsul-ob og puti nga brief apan hubo ang tibuok ibabaw nga bahin niini.

Nasuta nga nag-inusara lamang nga nagpuyo sa maong apartment ang maong langyaw ug walay nakit-ang forced entry ug walay kaguliyang sa lawak niini.

Dugang report gikan ni PO3 Franklin Bolaquita sa Crimes Against Persons Desk (Homicide Section) mibutyag nga adunay napalgang marijuana stick, usa ka syringe ug insulin nga medisina sa lawak niini. Ang patay’ng lawas gikatakdang ipailawom sa awtopsiya aron matino ang hinungdan sa kamatayon niini. - BANAT NEWS