CEBU, Philippines - Giawhag ang simbahang Katoliko nga motabang sa kampanya pagsumpo sa suliran bahin sa padayung pagkatap sa gidiling drugas pinaagi sa pagsukip niini sa mga relihiyosong seminar ilabi na sa magpakasal nga magtiayon.
Si kanhi Dangerous Drugs Board (DDB) Undersecretary Paul Clarence Oaminal misugyot nga sa seminar sa mga magpakasal nga mas labing maayo nga anha kini ibundak pag-ayo ang pagpahibawo bahin sa kadaotan sa gidiling drugas
Subay sa press statement nga giluwatan ni Oaminal nga gibase sa probisyon sa Comprehensive Dangerous Drugs Act of 2002 ilabi na sa seksyon V nga nagtugot sa pamilya, mga tinun-an, magtutudlo ug school authorities pagpatuman sa maong balaod batok sa illegal nga drugas.
“In the said article, it requires the implementation of the family drug abuse prevention program”, dugang asoy ni Oaminal.
Gipasabot niya nga ubos niini gihimug-atan ang dakung papel sa mga ginikanan sa paghatag og igong kasayoran nga may labot sa kampanya batok sa gidiling drugas.
Masaligon si Oaminal nga pinaagi niini hinay hinay nga makab-ot ang dugay na nga gipangandoy nga mahimong drug free Philippines ang nasud kun ma-edukar ang tanang ginikanan bahin sa dautang epekto sa drugas nga matudlo-an usab sa ilang mga anak. - BANAT NEWS