CEBU, Philippines - Grabeng naangol ang usa ka 17- anyos nga lalaki nga biktima sa pagpamusil sa miaging gabii gikan nagtan-aw og disco sa sitio Tubigan sa barangay Santican, dakbayan sa Danao.
Ang biktima (pangalan gipugngan) nagpuyo sa maong dapit ug ang nagpusil mao ang wala hiilhing lalaki kinsa dali usab nga nakasibat pahilayo sa maong dapit.
Si SPO1 Allan Muños sa kapolisan sa dakbayan sa Danao miingon nga naglakaw lang ang biktima kuyog sa iyang mga higala pauli sa ilang panimalay gikan sa disko dihang kalit gipusil sa wala hiilhing lalaki.
Si Muños miingon nga base sa iyang pakisusi may gikalalis nga usa ka lalaki sa disko kinsa kalit lamang usab nga nawagtang sa maong lugar.
Ang biktima nga nakabaton og samad pinusilan sa tuong dughan dali kining gidala sa iyang mga kabanay sa Vicente Sotto Memorial Medical Center sa dakbayan sa Sugbo. - BANAT NEWS