Proyekto sa PHILSCA gilusad

CEBU, Philippines - Pormal nang gisugdan ang hiniusang proyekto sa Philippine State College of Aeronautics (PHILSCA) sa Benito Ebuen Air Base Campus ug sa kagamhanang lokal sa dakbayan sa Lapulapu ang Community Extension Services Program alang sa mga out of school youth (OSY) ug sa mga walay trabahong inahan sa Brgy. Pajo dakbayan sa Lapulapu sa milabay’ng Sabado.

 Atol sa pormal nga paglusad sa proyekto gipasabot ni PHILSCA College President Dr. Bernard R. Ramirez nga una kining higayon dinhi sa Sugbo ug sa dakbayan sa Lapulapu ang pagpahigayon niining maong proyekto isip ilang “social responsibility” ngadto sa katawhan.

Usa sa ilang tinguha mao ang paghatag og higayon sa mga OSY ug sa walay trabaho nga makakat-on sa ilang gitanyag nga mga skill education alang sa ilang panginabuhi.

Nagpasalamat si Dr. Ramirez nga si Lapulapu City Mayor Paz Radaza ug Pajo Barangay Captain ug ABC President Leo Mercado miuyon sa maong proyekto tungod kay makatabang kini sa tanan nga taga dakbayan sa Lapulapu.

Gipasabot ni Dr. Nonadel Alvarado Soriano, ang Campus Director sa PHILSCA Mactan nga libre ang maong edukasyon nga ilang gitanyag sa mga OSY ug sa walay mga trabaho.

Ang maong proyekto may koordinasyon sa TESDA nga maoy mohatag og sertipiko niadtong molampos sa pagtuon sa bisan unsang skill education.

Ang maong sertipiko mahinungdanon kaayo aron himoong taming sa aplikante og trabaho dinhi sa nasud ug sa gawas.

Sa mensahe ni Radaza nga gibasa ni Lapulapu City administrator Teodolo Ybañez, kini nagpasalamat sa taga PHILSCA ug sa mga magtutudlo sa dako nilang ikatabang sa pagpalambo sa panginabuhi sa taga dakbayan sa Lapulapu.

Gani may 155 na ka tawo nga pasiunang nagpalista nga mokuha sa nagkalainlaing kurso diin 52 ang mikuha sa Computer Literacy, 20 sa Practical Electricity, 17 sa Basic Electronics and radio repair, 46 sa Welding ug 17 sa Sewing.

Si Mercado ug ang mga konsehal sa Pajo nagpasalamat sa PHILSCA gumikan sa pagpili sa ilang barangay isip pilot area sa maong proyekto.

Mitambong usab sa maong kalihokan ang PHILSCA Vice President for Administration and Finance Dr. Felix Boyles, Director for Extention Services Mrs. Weng Navera, PHILSCA Base Campus Director Capt. Jun Alipio.  - BANAT NEWS