Duha naangol sa pagpanunggab

CEBU, Philippines - Duha ka tawo ang nalandig sa tambalanan human kini panunggaba sa duha ka managlahing lugar sa dakbayan sa Talisay niadtong Huwebes sa gabii ug kagahapon sa buntag.

Ang mga biktima mao sila si Jerry Pable, 25, nga taga sitio Salvador, barangay Tanke, ug Antonio Villacorta, 42, taga Ramona Village, sa barangay Dumlog, tanan sakop sa dakbayan sa Talisay.

Si Pable giluba ni Lindy Malinte Gabisan, 18, iyang silingan sa Salvador kagahapon sa alas 8:20 sa buntag didto sa sitio Kilawan sa barangay Tangke.

Samdan siya sa tuong bahin sa li-og, tiyan, ug upat ka samad dinunggaban sa walang bukton.

Dali siyang gidala ngadto sa Talisay City District Hospital apan gibalhin kini ngadto sa Vicente Sotto Memorial Medical Center sa dakbayan sa Sugbo.

Si Gabisan nagtingkagol karon sa Talisay City detention cell human kini masikop nila ni PO3 Mikie Espina, PO2 Stephen Sefuesca ug PO1 Rosauro Pasumala.

Napunitan sa kapolisan ang usa ka Batangas knife ug laing kitchen knife nga may gitas-ong siyam ka pulgada sa lugar nga nahitaboan.

Gikataho nga sa wala pa ang pagpanunggab, ang suspetsado ug ang biktima nag-inom pa , ug nanganta sa videoke sa maong lugar apan dihang nangalasbag na, naglalis ug dihang nawad-an sa katarungan ang suspek, giluba niini ang biktima.

Samtang si Villacorta, giluba sa wala hiilhing kriminal didto sa Ramona Village niadtong Huwebes sa gabii.

Samdan siya sa dughan ug walang bukton ug didto siya dad-a sa   VSMMC.

Base sa imbestigasyon nila ni PO3 Alfredo Cuizon, PO3 Ferdinand Pablo, PO2 Ivan Ray Juarez ug PO1 Jundave David, nasayran nila nga dugoon ang biktima samtang naglingkod sa punoan sa mangga duol sa ilang balay nga nadiskobrehan sa higala niini.

Sa pagkakaron padayon pang gipangita sa kapolisan ang kriminal.   - BANAT NEWS