CEBU, Philippines - Pormal na nga gitunol kagahapon sa kagamhanan sa siyudad sa Sugbo ang mga pasidungog ug cash alang sa mga “Outstanding Farmers” sa siyudad nga gipasiugdahan sa Cebu City Agriculture.
Ang mga gipasidunggan mao sila si Fernando Arcilla sa Barangay Tagba-o, Lorna Borres ug Rowena Zanoria sa Adlaon, Ernesto Atuel sa Cambinocot, Freddie Soten sa Paril, Teodoro Borbon sa Guba, Joecel Codilla sa Lusaran ug Rubilyn Patindol sa Pung-ol Sibugay.
Sumala pa ni Mayor Michael Rama nga angayan saludohan ang mga mag-uuma gumikan kay sila maoy tinubdan sa atong mga pagkaon.
Dugang pa ni Rama nga ang siyudad mismo maoy motungas didto sa kabukiran aron paghatag og mga proyekto sa mag-uuma.
Samtang ang Adlaon Tugbong Vendors Association maoy napili nga outstanding farmer’s association ug gipasidunggan usab sa outstanding cooperative ang COBCAWA Multipurpose Cooperative.
Si City Agriculturist Joelito Baclayon miingon nga ikaduha na kini nga tuig gibuhat ang paghatag og pasidungog sa mga mag-uuma. (BANAT NEWS)