'Pusher' arestado

CEBU, Philippines - Wala makaipsot sa mga kamot sa kapolisan ang usa ka gipasanginlang drug pusher atol sa buybust operation nga gihimo sa kapolisan sa barangay Mantuyong dakbayan sa Mandaue sa milabay’ng hapon.

Ang nasikop mao si Paul Latonio, 32, residente sa maong dapit dihang sila si Insp. Henrich Bancolita sa City Anti Illegal Drugs Special Operation Task Force sa Mandaue City Police Office mipahigayon og buybust operation alas 5:15 sa milabay’ng hapon.

Matud pa ni Bancolita dayag na kaayo sa maong dapit ang pangalan ni Latonio nga maoy tigpayuhot sa illegal nga drugas (shabu).

Atol sa operasyon nasikop si Latonio ug nakuhaan og duha ka gagmay’ng pakete sa gituohang shabu.

Kasong kalapasan sa Akta Republika 9165 ang ipasakang kaso batok sa suspetsado samtang nagpaabot ang kapolisan sa resulta sa eksaminasyon sa PNP Crime Laboratory sa nasakmit nga ‘shabu.’(BANAT NEWS)