CEBU, Philippines - Usa ka lalaki kinsa suspetsado sa pagpatay nasikop sa mga polis human kini nalandig diha sa Cortes General Hospital sa dakbayan sa Mandaue sa miaging hapon tungod sa nasinating hilanat.
Ang nadakpan mao si Ebrahim Kasim alyas “Brix”, 42-anyos, lumad nga taga Marawi City ug kasamtangan nga nagpuyo sa barangay Mantuyong sa maong dakbayan kinsa dugay nang gipangita sa mga polis tungod sa kasong murder.
Si SPO2 Marcos Noval ug mga kauban sa Investigation Detection and Management Bureau (IDMB) maoy nakadakop kang Kasim pinasikad sa warrant of arrest nga giluwatan ni Judge Ulric Cañete sa Regional Trial Court (RTC) 7 niadtong Marso 10, 2010.
Ang team sa IDMB sa kapolisan sa dakbayan sa Mandaue nga gipangulohan ni SPO2 Noval ang nagdali sa pagsusi ngadto sa nahisgutang tambalanan human nila madawat ang report nga si Kasim kinsa dugay na nilang gipangita ang nalandig sa nahisgutang tambalanan.
Sa mao nilang pakisusi ilang nasuta nga positibo ang maong kasayuran nga ilang nadawat ug gi-serve dayon nila ang warrant of arrest ngadto kang Kasim.
Nunot sa pagkasikop ni Kasim maoy gihimo ni Inspector Ramil Morpos, hepe sa IDMB sa pagdestino sa iyang mga sakop sa pagbantay sa suspetsado diha sa tambalanan. (BANAT NEWS)