'Adik' sa barangay hall 'sakpan

CEBU, Philippines - Walo ka mga personnel sa barangay San Nicolas dakbayan sa Sugbo ang nasutang positibo sa paggamit og ginadiling drugas human sa gipahigayong surpresang drug test kagahapon sa buntag.

Ang nahisgutang drug test gipahigayon sa Cebu City Office on Substance Abuse Prevention (COSAP) ubos sa hangyo sa kapitan sa nahisgutang barangay nga si George Rama.

Ang 51 ka mga personnel lakip na niini ang mga kawani sa barangay, tanod ug garbage collector gipasumitir sa ilang mga ihi nga maoy eksaminon ug walo kanila ang positibong migamit og ilegal nga drugas.

Ang opisyal sa COSAP nga si Jose Felix Lazarte nagkanayon nga ang drug sample kits maka-detect kini sa Methamphetamine Hydrochloride o shabu, ipailawom pa hinuon sa confirmatory test ang maong napositibong sample.

Matud usab ni Lazarte nga ang resulta sa nahisgutang drug test ipadala nila ngadto sa Philippine National Police (PNP) Crime Laboratory aron makompirma ug ang resulta niini ma-release sulod sa usa ka semana.

Si Rama nagkanayon nga taktakon gikan sa ilang trabaho ang walo ka mga personnel kung mapamatud-an ug makompirma nga positibo gyud sa paggamit og ginadiling drugas. (Brenda D. Batuto ug Garry B. Lao sa The Freeman) (BANAT NEWS)