CEBU, Philippines - Usa ka ulitawo napalgang nagbitay patay sulod sa iyang lawak sa sitio Ratan barangay Tangke syudad sa Talisay kagahapon pasado alas 8:00 sa buntag.
Siya si Gregorio Abelido, 25, molupyo sa maong dapit kansang liog gihiktan og gamay nga alambre kansang pikas tumoy gigaid sa sagbayan sa iyang lawak nga maoy nakapahunos sa iyang kinabuhi.
Matud pa ni SPO1 Oliver Dacua sa pakighimabi sa Banat News miingon nga ang kabanay ni Abelido nagtuo nga mabuhi pa ang ulitawo kay abi nila kun nakuyapan lang, apan sa paghiabot niini didto sa Talisay City District Hospital gideklarar kini nga dead on arrival sa doctor nga nag-atiman.
Midugang si Dacua nga base sa ilang nakuha nga impormasyon nga sa wala pa maghikog si Abelido giingong gikasab-an kini tungod kay milaag ug wala mahauli sa ilang balay sulod sa tulo ka adlaw.
Apan giklaro ni Dacua nga ila pang gisusi kun unsa katinuod ang maong taho. (BANAT NEWS)