CEBU, Philippines - Ang kagamhanan sa dakbayan sa Talisay milusad sa ilang hugtanong kampanya sa pagpakigbatok sa dengue pinaagi sa pagpahigayon og mga lecture ngadto sa mga tunghaan ug kabarangayan sa siyudad.
Si Konsehal Choy Aznar, chairman sa komitiba sa panglawas sa Talisay nagkanayon nga sa pagkakaron wala sila’y mga nadawat nga report bahin sa nabiktima sa dengue sa Talisay.
Apan niining panahon sa uwan-uwan, miingon si Aznar nga dili na sila maghuwat nga dunay mabiktima sa dengue hinungdan nga gilusad dayon nila ang ilahang programa aron sa pakigbatok sa maong matang sakit.
Sa milabay’ng adlaw ang mga staff ni Aznar miapud-apod og 70 ka mga tarpaulin ngadto sa mga pampublikong tunghaan sa siyudad.
Ang maong tarpaulin maoy silbing guide sa mga magtutudlo ug estudyante pagmentinar sa ilang tunghaan nga mahimong ‘dengue free’.
Sa sunod buwan si Aznar gitakdang mobisita sa 22 ka mga barangay sa dakbayan sa Talisay alang sa clean up drive.
Ang siyudad temporaryo unang mihunong karon sa pagpahigayon og misting tungod kay giingong makadaot kini sa kalikupan apan migamit sila og kemikal nga ibubo sa mga kanal ug ngadto sa posibleng puy-anan sa lamok nga dengue sama sa lim-aw ug uban pang dapit nga pundohanan sa tubig.
Sa milabay’ng tuig mikabat sa unom ka bata ang namatay tungod sa dengue sa dakbayan sa Talisay.
Si Aznar nagkanayon nga paningkamutan nila nga karong tuiga mokunhod ang kaso sa dengue sa dakbayan. - BANAT NEWS