CEBU, Philippines - Patay ang usa ka lalaki human kini makuryentihan samtang nag-ayo sa roll-up door sa usa ka tindahan diha sa barangay Cansaga, sa lungsod sa Consolacion pasado alas-7 sa milabay’ng gabii.
Ang biktima giila nga si Jovan Baclaan, residente sa Upper Tipolo, Mandaue City. Si Baclaan trabahante sa Kima Glass Supply Co. Inc., nga nagbase sa barangay Basak, sa dakbayan sa Mandaue uban sa kaubang si Rolly Antipolo ug Wilmar Baclado aron unta ayuhon ang nagubang roll-up door sa Quickcall Cellshop.
Matud pa ni PO3 Allen Garciano nga sila si Baclaan ug Antipolo mikatkat sa taas nga bahin sa maong tindahan aron pangitaon kung unsay problema sa maong pultahan
Apan nakurat nalang si Baclado dihang kalit milayat si Antipolo diha sa ubos. Matud pa nga gisultihan ni Baclado si Antipolo nga ‘grounded’ ang ilang gitungtungan sa ibabaw.
Diha nalang nila mabantaying wala makakanaog si Baclaan hinungdan nga dali nila kining gisusi ug mao nalay ilang nakita nga nagbuy-od na kini sa ibabaw nga bahin hinungdan nga nanawag sila og tabang.
Daling gitabang ang biktima ug gidala sa Eversley Hospital apan gideklarar kining dead on arrival. (BANAT NEWS)