Sunog 3 ka balay ugdaw

CEBU, Philippines - Dul-an sa P300 mil ang danyos sa sunog nga nahitabo sa Zone 2 Barangay Dumlog Talisay City kagahapon sa pasado alas 12:55 sa udto.

Duha ka panimalay ang hingpit nga gikaon sa kayo nga gipanag-iya ni John Lo ug Marites Rabaya .

Ang maong mga balay nagtapad sa usa ka lugar samtang laing usa ka balay nga gipanag-iya ni John Michael Guba igo lang nakan-an sa kayo apan wala maugdaw sa hingpit kay distansya kini og dyutay gikan sa balay ni Lo ug Rabaya.

Si SPO1 Bobby dela Cerna nga nahinabi sa Banat News mibutyag nga short circuit ang hinungdan sa sunog .

Hinuon walay samdan o kaha namatay sa maong hitabo.

Mapasalamaton gihapon siya nga sulod sa 5 ngadto sa 7 ka minutos nakontrolar nila ang sunog kay gisuportahan sila sa kabomberohan sa Minglanilla ug sa Barangay. Sto. Niño Fire Brigade.

Ang mga biktima sa maong sunog anaa karon sa barangay hall ug padayon pang gipangitaan og lugar nga kapuy-an nila. - Uban ni Monnahlie Olandria (BANAT NEWS)