CEBU, Philippines - Mahitabo na ugma sa gabii ang giatangan nga tinuig nga kompetisyon sa fireworks sa dakong hawanan gawas sa SM City- Cebu nga pasiugdahan sa Pyroworks nga nagbase dinhi sa Sugbu.
Mosalmot sa maong kompetisyon ang Nation Fireworks sa Sto. Niño, Bulacan nga kaduha na nga nahimong kampeyon sa nagkadaiyang pyrotechnic festival sa nasud.
Motigi usab ang Dumaguete Surf Station, St. Michael - Sta Maria sa Bulacan; Digispec Enterprises sa Oroqueta, Misamis Occidental; Anisan Fireworks sa Sibulan, Negros Oriental ug De Lumpa Fireworks sa Ilo-Ilo. Nalakip usab sa listahan mao ang Skyglitters nga nahimong champion sa Enchanted Kingdom Asian Sky Wizardry Competition. Human niini, ang tigpasiugda sa kompetisyon, ang Pyroworks, mopakita usab sa ilang pyromusical demo show nga diin ang mga pabuto idungan pinaagi sa precision ug timing sa musika ginamit ang modernong computerized firing system.
Kahinumduman nga ang Pyroworks nga gipanag-iya ni Brian Benjamin Lim maoy kasamtangang naghupot karon og titulo sa Guinness Book of World Records gumikan sa pagpalupad nila og 128,501 nga fireworks sulod lang sa 30 segundos.
Mahitabo usab karong Enero 16 ang nagkadaiyang fireworks display sa Cebu City Sports Center human sa pagpahibalo sa mga midaog nga contingents; sa Crown Regency Tower 3 alas-8 sa gabii ug Ayala Business Park sa hawanan sa Bigfoot. (BANAT NEWS)