CEBU, Philippines - Gihimakak sa director sa Philippine Drug Enforcement Agency (PDEA) ang pasangil sa usa sa mga suspetsado nga nasikop atol sa buy bust operation niadtong Sabado sa gabii sa barangay Poblacion syudad sa Talisay nga usa siya ka asset sa PDEA.
Matud ni PDEA Regional Director Adrian Alvariño nga dili nila asset si Jezer Banzon, 30, nga taga Phase 1, Block 36, lot 9, sa Deca Homes sa barangay Tungkil, lungsod sa Minglanilla .
Midugang si Alvariño nga dugay na nga wala silay asset kay iya na kining gidili.
Samtang sa pakighinabi sa Banat News sa Public Information Officer sa Central Command Major Christopher Tampus, gipanghimakak usab niini nga si William Quiñones, 28, kinsa nadakpan usab sa maong buy bust, dili tinuod nga usa ka sundawo, sumala sa iyang gitug-an sa mga otoridad.
Kahinumdoman nga niadtong Sabado sa gabii mipahigayon og buy bust operation ang mga operatiba sa Provincial Intelligence Branch (PIB) nga gipangulohan ni SPO2 Rami Villaluz.
Nakuha sa kapolisan gikan sa suspetsado mao ang dagkong pakete sa shabu nga nagkantidad og P 32 mil , usa ka armas nga kalibre .45, uban sa duha ka magazine niini nga may pito ka buhing bala ug usa ka black holster.
Samtang nasakmit usab ang duha ka motorsiklo nga gigamit sa mga suspetsado sa ilang illegal nga patigayon.
Matud pa ni Villaluz nga ang mga suspetsado maoy tig-supply og ginadiling drugas gikan sa syudad sa Sugbo paingon ngadto sa lungsod sa Malabuyoc.
Midugang si Villaluz nga may kauban ang duha ka suspetsado nga naila lang sa ngalang Janeth nga taga Talisay kinsa naka-ikyas sa maong higayon . Miingon si Villaluz nga ang grupo maka-ariya og shabu nga 50 gramos matag semana sa kantidad nga P350 mil.
Ang mga suspetsado gitakdang pasakaan og kasong illegal possession of firearm ug illegal possession of illegal drugs. (Lesley Caminade) (BANAT NEWS)