Ombudsman magbag-o

CEBU, Philippines - Taliwala sa gipalanog ni Assistant Ombudsman Virginia Palanca Santiago nga mag-bag-o unta ang mga opisyales sa gobiyerno apil na ang katawhan, ang Ombudsman Visayas mipahibawo nga sila maoy unang magbag-o sa ilang buhatan.

Si Deputy Ombudsman for the Visayas Pelagio Apostol sa interbyu sa DyRF nagkanayon nga sugod karong tuig 2011 usbon na niya ang sistema sa iyang buhatan.

Kini aron mahatagan og pagtagad ang tiyabaw sa katawhan alang sa daling imbestigasyon ug daling kahumanan sa disisyon sa kaso.

Matud pa ni Apostol nga nakadawat siya og kamanduan gikan ni Ombudsman Mercidetas Gutierrez nga dalion ang paghuman sa mga kasong ilang gihuptan batok sa mga opisyales sa gobiyerno nga gipangreklamo.

Partikular na ang mga kasong pagpangilkil sa kwarta sa gobiyerno, pag-abuso sa katungdanan ug uban pang kalapasan sa balaod.

Gipasabot ni Apostol nga ang iyang buhatan makahimo na sa pagpakanaug og desisyon sa mga kaso nga ubos sa ilang hurisdiksyon.

Sigon pa niini nga kining maong sistema gipatuman kini kaniadto ni kanhi Ombudsman Simeon Marcelo, giundang sa panahon ni Gutierrez, apan gibalik na usab kini sa pagpatuman sugod karong tuig 2011. Apan giklaro niini nga ang kaso sa mga gobernador ug mga regional directors sa nagkadaiyang ahensiya sa kagamhanang national adto na tiwason sa ulohang buhatan sa Ombudsman.

Dugang pa ni Apostol nga ilang paningkamutan nga madali og sulbad sa ilang buhatan ang nagtapun-og nga mga kaso sa Ombudsman Visayas. (BANAT)