2 ka tawo gipanunggab naangol

CEBU, Philippines - Duha ka tawo gipangluba sa managlahing lugar ug oras ning dakbayan sa Sugbo sa miaging adlaw.

Sila mao si Carlos Rama y Cabatuan, hingkod nga taga barangay Quiot, ug si Anatalio Maquiso y Badana, 41, nga taga barangay Apas, pulos ning dakbayan sa Sugbo.

Ang suspetsadong miluba kang Rama mao ang giingong inahan ug anak nga sila si Linda ug ang anak niini nga si Alex.

Misulti ang biktima ngadto sa kapolisan nga nagbarog siya atubangan sa ilang balay dihang miabot ang mga suspetsado nga karaan niyang kabangi bahin sa yuta ug human sila magkasinukliay og mga mahait nga pulong milanit ang mga suspetsado sa ilang kutsilyo ug gigubhan og dunggab ang kalawasan sa biktima busa nabulit kini sa mga samad nga miabot sa tambalanan.

Samtang ang suspetsadong midunggab kang Maquiso mao si Eric Avenido y Babadillo, 29, nga taga sitio Sagrada, barangay Guadalupe, dakbayan sa Sugbo.

Ang biktima mitug-an sa kapolisan nga nagsakay siya ug naglingkod sa front seat sa jeep nga pasaheroan dihang gitangkugo siya pagluba sa suspetsado kinsa naglingkod sa iyang likod.

Ang mga biktima gihatod dayon ngadto sa Cebu City Medical Center, aron katambalan sa ilang mga samad , samtang ang mga suspetsado gipangita pa sa kapolisan human kini manibat. - BANAT NEWS