CEBU, Philippines - Giawhag ang mga lokal nga kagamhanan sa tibuok nasud nga ipaubos sa drugtest ang mga kawani niini sa dili pa hatagan og christmas bonus karong Pasko aron nga walay mga kawani niini nga nabuang sa ginadiling drugas.
Si kanhi Dangerous Drugs Board (DDB) Undersecretary Paul Clarence Oaminal maoy misugyot niini human niya ipasabot ang kamahinungdanon nga mapaubos sa drugtest ang mga kawani sa gobyerno gumikan kay salikwaot kaayong paminawon nga gi-obligar sa kagamhanan ang mga pribadong buhatan pagpatuman sa Drug Free Workplace Program, samtang sa gobyerno wala.
Gihimong sanglitanan ni Oaminal ang Mandaluyong City nga higpit nga gipatuman ni Mayor Benjamen Abalos ang maong programa sa pagpaubos sa drugtest sa mga kawani niini sa City Hall.
Dugang ni Oaminal nga kun nakahimo niini ang Mandaluyong City, way rason nga dili usab makapatuman niini ang ubang mga lokal nga kagamhanan sa nasud.
Nagtuo si Oaminal nga ang bug-at nga katarungan nga nagmagahi ang ubang mga gobernador, mga mayor ug kapitan sa barangay sa pagpa- drugtest sa ilang mga kawani mao ang kahadlok nila nga masakpang positibo sa drugas ang mga paborito nilang kawani.
Gikalipay hinuon ni Oaminal nga si Davao City Mayor Sara Duterte miluwat karon og direktiba nga nagsagop sa Drug Free Workplace Program sa iyang lugar. (BANATNEWS)