Nanggukod og kutsilyo gipatay

CEBU, Philippines - Patay ang usa ka lalaking hubog human kini pusila sa wala mailhing kriminal kinsa giingong gigukod niini og kutsilyo niadtong Sabado sa gabii diha sa sitio Maglasang, barangay Cansojong, dakbayan sa Talisay.

Ang biktima giila sa mga polis nga si Noel Cabrera, residente sa nahisgutang lugar kinsa nakaangkon og samad pinusilan sa tuong bahin sa dughan, ubos nga bahin sa tuong ilok, tuong bukton ug tuong bahin sa buko-buko ug wala na makaabot nga buhi ngadto sa Talisay City District Hospital.

Si PO3 Mikie Espina nga nahinabi sa Banat News mibutyag nga sa wala pa mahitabo ang insidente si Cabrera uban sa iyang mga higala nga sila si Renier Cañas ug Alex Perez nag-inom diha daplin sa karsada.

Usa ka wala mailhing lalaki ang miagi diha sa karsada ug giingong gigukod ni Cabrera og kutsilyo tungod kay nasuko ang biktima nga gitutokan siya niini og tan-aw.

Ang maong lalaki mikaratil og dagan ug pipila ka minutos ang milabay mibalik kini nga nag-angkas na og usa ka motorsiklo ug gipusil si Cabrera.Si Cabrera ug ang duha niya ka kainom nag-alibwag og panagan.

 Atol sa maong hitabo miagi ang usa ka multicab nga gimaneho ni Joven Tradeo ug giingong kalit gilayatan sa biktima ug mimandong magpahatud sa tambalanan apan pag-abot sa TCDH patay na kini.

Si Espina mibutyag nga base sa ilang nahipos nga report si Cabrera giingong dunay mga kaaway diha sa ilang lugar tungod kay magmaoy kini kun mahubog.

Si Espina midugang nga niadtong milabay’ng tuig si Cabrera gisulod diha sa ilang balay ug gipusil sa usa ka wala mailhing lalaki samtang ang biktima nagtan-aw og TV.

Sa maong pagpamusil naigo ang nawong ni Cabrera ug dughan ug swerte siya niadtong higayona nga wala mamatay. (BANATNEWS)