Driver ug polis gipusil

CEBU, Philippines - Usa ka habalhabal drayber ang gipusil samtang naangol usab ang pulis nga miresponde sa maong alarma sa miaging alas 11:45 sa gabii diha sa atubangan sa Prince Warehouse Club nga nahimutang sa barangay Bulacao ning dakbayan.

Ang gipusil nga habalhabal drayber giila sa Homicide Section nga mao si Diosdado “Onyot” Sonza ,30, nahiagom og pinusilan sa tuong bahin sa iyang lawas nga taga sitio Siwak sa nahisgutang barangay.

Samtang ang naangol nga pulis mao si PO1 Richard Salcida samdan sa tuong paa ug sakop sa Beat Patrol nga nadestino sa Pardo Police station.

Segun sa imbestigasyon sa kapolisan si Sonza mao gyud ang target sa duha ka wala mailhing tawo nga nagsuot og ski mask sa ilang mga nawong nga nagsakay og motorsiklo.

Ang mga gikatahapan kalit lang miabot ug mihunong sa lugar ug wala nay daghang pangutana gidiretso og pusil si Sonza. Apan si PO1 Salcida nga diha sa palibot daling miresponde apan napusilan hinuon siya sa mga gikatahapan dayon nang sibat niini palayo sa lugar.

Si Salcida naigo sa paa daling gidali pagdala sa tambalanan apil na ang habalhabal drayber nga maoy unang gipusil.Laing pulis nga si PO1 Exelcior Aguanta nga sakop sa Cebu Mobile Tax Collection sa Cebu City Police Office (CCPO) kinsa nahiagi sa gihitaboan misuway og gukod sa mga mamumuno apan wala niini maabti. Nagtuo ang mga imbestigador nga napagan lang si Salcida sa dihang miresponde kini sa maong alarma.

Si PO3 Victor Ayuman sa Homicide Section nga nahinabi sa Banat News sa telepono nagkanayon nga wala pa silay motibo kun nganong gipusil si Sonza.

Si Sr. Supt. Melvin Ramon Buenafe, hepe sa CCPO nga nahinabi sa Banat News miingon nga iya nang gimanduan ang Homicide Section ug Pardo Police Station nga moimbestigar niini.

Iya usab gitug-an nga dunay ayuda nga ihatag ang PNP ngadto ni Salcida alang sa galastuhan niini sa tambalanan. – BANAT NEWS